கமெண்ட் பண்ணுவது எப்படி? – படு சீரியஸான தொ.நுட்ப பதிவு

மூன்றாவது வருடம் வலைப்பதிவுலகில் நடைபோட்டு வருகின்றேன். இதுவரை சினிமா, அரசியல், விளையாட்டு, நகைச்சுவை என பலதரப்பட்ட விடயங்களை பகிர்ந்து கொண்டாலும் ஒரு தொழில்நுட்ப பதிவும் எழுதவில்லை. அந்த குறையைப் போக்க ஆழமாக யோசித்து ஒரு தொழில்நுட்ப பதிவு இன்று. இதையும் எழுதலைன்னா என்னை எல்லாம் ஒரு ப்ளாக்கராவே மதிக்க மாட்டாங்க. (இப்ப மட்டும் என்ன வாழுதாம்!)

இந்தப் பதிவு, கடைசியா கந்தசாமி அண்ணாச்சி போட்ட தொ.நுட்ப பதிவுக்கு எதிர்ப்பதிவு இல்லை எண்டுறதை மைந்தனின் ஹன்சிகா மேல சத்தியம் பண்ணுறன்.

நம்ம கடைக்கு சராசரியா ஒரு நாளைக்கு 500 பேர் வாராங்க. (போடுற சரக்கைப் பொறுத்து கூடும், குறையும்) “புதுப்பெண்டாட்டியை பர்ஸ்நைட்ல உச்சந்தலையில் இருந்து உள்ளங்கால் வரை ஏற இறங்கப் பார்க்கிற மாதிரி” வடிவா சுத்திப் பார்க்கிறாங்க. அப்பிடியே போயிடுறாங்க. எவனே 10 – 15 பேர் தான் சாமான் வாங்குறாங்க. அதுவும் நான் காசு குடுத்து “சாமான் வாங்க வாங்கடா” எண்டு கூப்பிடுற மாதிரி பக்கத்து கடைக்காரனுக்கு தெரியுது. இந்த விசயம் நம்ம கடையில மட்டுமில்ல எல்லாக் கடையிலையும் நடக்கிற விசயம் தான். கடை எண்டா என்னெண்டு விளங்கினது தானே மாப்பிளைங்களா?

எங்கள் பதிவுகளுக்குரிய ரெஸ்போன்ஸ் பின்னூட்டம் அல்லது வாக்கு. அது தங்களுக்கு கிடைக்க வேண்டும் என எல்லாப் பதிவர்களும் ஆசைப்படுவார்கள். தாங்கள் யாருக்கும் அதைச் செய்ய மாட்டார்கள். (இந்த லிஸ்ட்ல முதலாவது அகசியம் வலைப்பூவின் ஓனர்) இதுக்கு என்ன காரணமாக இருக்கலாம் என பாத்ரூமில் இருந்து யோசித்த போது ஒரு விசயத்தை ஊகிக்க முடிந்தது. பலருக்கு பின்னூட்டத்தை எங்கே இடுவது எனத் தெரியவில்லை. இதற்காக 10 நாள் ஹோம் வேர்க் பண்ணி நான் ஒரு இடத்தை கண்டு பிடிச்சிருக்கிறன்.

எங்காவது திரட்டிகளில், இல்லாவிடின் தேடுபொறிகளில் வலைத்தளம் ஒன்றுக்கு செல்லுங்கோ. அங்கே நீங்கள் வாசிக்க விரும்பும் பதிவு ஒன்றைத் தேர்ந்தெடுத்து அதன் தலைப்பில் கிளிக்குங்கோ. பதிவை ஆற, அமர வாசியுங்கள். பதிவு முடிந்த பிற்பாடு யார், யாரோ வந்து சம்பந்தம் இல்லாமல் கதைச்சிருப்பாங்க. அப்பிடியே பொறுமையா கடைசி மட்டும் வாங்கோ, இப்ப இப்பிடி ஒரு விசயம் இருக்கும். Post a Comment அதை கிளிக்குங்கோ!

Leave Your Comment இப்பிடி ஒரு பொக்ஸ் வரும், அதுக்குள்ள நீங்க நினைக்கிற என்ன கன்றாவியை எண்டாலும் அடிச்சு Publish Your Comment ஐ கிளிக் பண்ணி விடுங்கோ! சிலவேளை உங்கட கமெண்ட் உடன வரும். இல்லாட்டி ஓனர் வந்து பப்பிளிஸ் பண்ணும் மட்டும் அடிக்கடி வந்து பாருங்கோ! ஓசில ஹிட்ஸ் கிடைக்கும்.

அச்சாப் பிள்ளையள் நான் சொல்லித் தந்த மாதிரி எனக்கு கமெண்ட்ஸ் போடுங்கோ!

இன்னொரு நாள் “வாக்கு போடுவது எப்படி?” எண்ட தொ.நுட்ப பதிவுடன் உங்களைச் சந்திக்கிறன். (எவன்டா அது கல்லைத் தூக்குறது.. நான் அவன் இல்ல..)